Mustang 2o. poema ¿SOLEDAT?

¿SOLEDAT?

La soledat te mata, dizes.
Sí, nina, sí, de pistón.
No quiero pas faltar-te,
ben el sabes,
pero yo me’n jodo,
de la soledat.

Diz el marinero
(¿Ba n’i aber mai
un marinero que charrase aragonés,
u ban estar,
como en la nobeleta de Chusé Inazio,
nabaters rezicllaus?):
‘No soi pas solano,
soi con la mía pipa.’
Semellant dirá el pastor,
‘no soi pas solano,
soi con el mío fumarret
y con el mío pinfano,
que fa mosica
solo con que le faigas dos fiestetas
y le i metas aire.
Y con el prau berde,
plleno a caramull de fllors bllancas.
Y con el cochet d’atura,
que bate la coda cuan el grito.
Y con las güellas,
que minchan quietas al mío costau
como si se i posasen pa que las dibuixasen
en un mapa economico:
“GANAU OBINO N’ARAGÓN”.’

Soy con yo y con el mundo,
digo yo tamé.
Soi con las mías guitarras,
que ban como el pinfano
pero no les cal ni aire.
Las fiestetas y prou.
Soi con es risos d’es amigos y las amigas,
encara que seigan de fa dos días
u falten dos días pa que i tornen.
Soi con el sol que me calenta y,
de cabo cuan,
me crema.
Y con las estrellas que
bailan el Ball Plla con la lluna
i me i conbidan.

¿La soledat mos mata, dizes?
Sí, nina, sí. ¡De pistón!
La soledat no mos mata pas.
La unica cosa dolenta de la soledat
é que no i és.